ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى ۆاكۋمدىق سىناما الۋ قوندىرعىسىن قۇراستىرىپ شىعاردى. قۇرىلعى سۋ ۇلگىلەرىن الۋعا جانە سۋداعى ورگانيكالىق لاستاعىشتاردى انىقتاۋعا ارنالعان, دەپ حابارلايدى Egemen.kz.
عىلىمي جوبانىڭ جەتەكشىسى باعدات ساتىبالديەۆتىڭ ايتۋىنشا, قوندىرعى ەنەرگيا كوزدەرىنە تاۋەلدى ەمەس, سونداي-اق شولدى ايماقتاردا قولدانۋعا وتە ىڭعايلى.
«قوندىرعى ەلىمىزدە العاش رەت جاسالىپ وتىر. اتالعان قوندىرعىنىڭ كومەگىمەن 300-گە جۋىق سىناما الۋعا بولادى. گەرمانيا, اقش جانە باسقا مەملەكەتتەردە بۇل قوندىرعىنىڭ انالوگتارى بار. بىراق ولار ەلەكتر توگى ارقىلى جۇمىس ىستەيدى. ال بىزدىڭ ونىم ەنەرگيا قۋاتىنسىز جانە ايماقتارداعى وزگەرىستەرگە قاراماستان جۇمىس ىستەي بەرەدى. بۇل سۋ سىنامالارىن الۋ جۇمىسىن الدەقايدا جەڭىلدەتەدى», دەيدى جوبا جەتەكشىسى.
اتالعان قوندىرعىنى وقۋ ورداسىنىڭ عالىمدارى سىردارياداعى سۋ ساپاسىن زەرتتەۋگە جانە انىقتاۋ جۇمىستارىنا قولدانعان. ناتيجەسىندە وزەن سۋىنىڭ قۇرامىنان حلور, ورگانيكالىق پەستيتسيدتەر, فۋنگيتسيدتەر جانە گەربيتسيدتەر انىقتالعان.
بۇگىنگى تاڭدا يننوۆاتسيالىق جوباعا پاتەنت الۋ جۇمىستارى جۇرىپ جاتىر. ءسىناما الۋدىڭ پروتوتيپى اقش-تا سىناقتان ءوتىپ جاتىر. تەستىلەۋدەن ساتتى وتكەننەن كەيىن ۋنيۆەرسيتەت عالىمدارى قوندىرعىنى كوممەرتسيالاندىرۋ ماقساتىندا نارىققا شىعارۋدى كوزدەپ وتىر.